သင်တန်းဆရာမတစ်ဦးဖြစ်သည့် ဒေါ်ဆုမြတ်ဝင်း (ဓာတ်ပုံ - ပြည့်ပြည်/Myanmar Now)
ရန်ကုန် (Myanmar Now)- မာလ်တီမီဒီယာ သတင်းစာပညာ ဒီပလိုမာဘွဲ့ပေးမည့် ၁၁ လ ကြာ သင်တန်းကို စက်တင်ဘာလလယ်ပိုင်းတွင် စတင်မည် ဖြစ်ကြောင်း ရန်ကုန်မြို့ရှိ စာနယ်ဇင်းသင်တန်းကျောင်းတစ်ခုက သြဂုတ် ၁၆ ရက်နေ့တွင် ပြောသည်။
စမ်းချောင်းမြို့နယ်တွင် တည်ရှိသည့် မြန်မာသတင်းပညာသိပ္ပံက ဖွင့်လှစ်မည့် သင်တန်းကာလအတွင်း အခြေခံသတင်းစာပညာ၊ ရေဒီယို နှင့် ရုပ်သံသတင်း ပေးပို့ခြင်း၊ သတင်းဓာတ်ပုံ၊ ဒစ်ဂျစ်တယ်မီဒီယာ၊ စာနယ်ဇင်းကျင့်ဝတ်၊ မီဒီယာဥပဒေ၊ သတင်းသရုပ်ဖော်ဆောင်းပါး၊ သဘာဝပတ်ဝန်းကျင်၊ အလုပ်လျှောက်လွှာ ရေးသားခြင်း စသည့် အကြောင်းအရာများကို စာတွေ့၊ လက်တွေ့ သင်ယူနိုင်မည်ဟု ဆိုသည်။
သတင်းတိုက်များတွင် အလုပ်သင်အဖြစ် ဝင်ရောက်လုပ်ကိုင်ခြင်း၊ ရက်ရှည် ခရီးထွက် သတင်းလိုက်ခြင်း စသည့် အစီအစဉ်များလည်း ပါဝင်သည်ဟု သိရသည်။
သင်တန်းတက်ရန် လျှောက်ထားသူများထဲမှ အမျိုးသမီး၊ တိုင်းရင်းသားလူမျိုး၊ မသန်စွမ်းသူတို့ကို အလေးပေး စဉ်းစားရွေးချယ်မည်၊ ရန်ကုန်ပြင်ပမှ လာရောက်မည့်သူတို့ နေထိုင်ရန် အဆောင်များ စီစဉ်ပေးသွားမည်ဟု မြန်မာသတင်းပညာသိပ္ပံ၏ အမှုဆောင်ဒါရိုက်တာ ဦးသီဟစောက ပြောသည်။
ရန်ကုန် တက်ရောက်သူ ဦးရေု၂ဝ၊ တစ်ဦးလျှင် သင်တန်းကြေး သိန်း ၂ဝ သတ်မှတ်ထားကြောင်း၊ သင်တန်းကြေးကို အရစ်ကျ ပေးသွင်းနိုင်ကြောင်း သိရသည်။
ပညာသင်ထောက်ပံ့ကြေး ၁၅ သိန်း လျှောက်ထားနိုင်သည်ဟု ဆိုသည်။
ယခုကဲ့သို့သော သင်တန်းမျိုးကို မြန်မာသတင်းပညာသိပ္ပံက နှစ်ကြိမ် ပြုလုပ်ခဲ့ပြီးဖြစ်ရာ ပြည်တွင်းပြည်ပ သင်တန်းနည်းပြများက သင်ကြားလေ့ကျင့်ပေးခဲ့သည်။
Comments
Post a Comment